У невялічкай утульнай зале сельскага клуба, старанна упрыгожанай таленавітымі рукамі вясковых майстрых, гасцей чакала творчая справаздача мясцовых самадзейных артыстаў, якія пастараліся на славу. Кожны нумар канцэртнай праграмы адпавядаў тэме агляду-конкурсу, які ў гэтым годзе прысвечаны Году малой радзімы і 75-годдзю вызвалення Беларусі ад нямецка-фашысцкіх захопнікаў. Шчырымі апладысментамі сустракалі прысутныя самадзейных артыстаў: прыгожых жанчын - удзельніц жаночай вакальнай групы, якія цудоўна выканалі некалькі добра вядомых песень і якім падпявала ўся зала, юных удзельнікаў гурткоў сольнага спявання і мастацкага чытання, саліста М.Кротава. Таленавітая чытальніца і самадзейная” тэатралка” Н.Буйноўская з густам прачытала гумарыстычны верш “Гаспадар”, а потым разам з удзельніцамі жаночай вакальнай групы прадставіла гумарэску “Як жонка на базары мужа прадавала”(аўтар –І.Івашкевіч). У зале панаваў добры творчы настрой, і гледачы, і артысты атрымалі шмат станоўчых эмоцый. Адметна, што ў летні час работнікі клуба маюць намер парадаваць сваім выступленнем жыхароў аддаленых вёсачак рэгіёна.