Восьмы «Жодзішкаўскі карагод» запаліў свае агні. Свята, якое стала сапраўднай візітоўкай Жодзішкаў, сабрала шмалікіх гасцей. Галоўны герой – чароўны Чаравік – зноў закружыў усіх у віхуры весялосці.
Для ўрачыстага адкрыцця фестывалю на сцэну запрасілі пачэсных гасцей. Па добрай жодзішкаўскай традыцыі, каб лічыць фестываль адкрытым, пачэсныя госці сталі па адной назе ў сімвалічны чаравік і разам з усімі ўдзельнікамі і гледачамі крыкнулі: «Фестываль пачынаецца!». Затым госці закружыліся ў вядомай усім «Лявонісе», падаючы прыклад прысутным.
Адной з галоўных забаў стала выстава-конкурс на самыя прыгожыя і крэатыўныя чаравікі, якія падрыхтавалі госці свята. Усе работы размясцілі ля фотазоны, і кожны жадаючы мог прагаласаваць за пару, якая найбольш спадабалася. Але галоўнае напружанне вітала ў паветры, калі на пляцоўку выйшлі ўдзельнікі конкурсу на «Лепшую пару свята». Канкурсанты спаборнічалі ў трох узроставых катэгорыях: дзеці, моладзь, вопытныя танцоры.
