У зале было па-сямейнаму цёпла і ўтульна. На сустрэчу з мясцовымі артыстамі сабралася шмат аднавяскоўцаў, якія падчас канцэрту не шкадавалі гучных апладысментаў. Гледачоў парадавала выступленне дзетак - Румэнка Аляксея, Анастасіі, Соні, а таксама “маленькай модніцы” Ані Капыловай. Цудоўныя вершаваныя творы аб любові да роднай зямлі, аб міры і згодзе прагучалі ў выкананні Галіны Аўгусціновіч і Тэрэзы Крэчкі, а гумарэска “У санаторыі”, якую цудоўна абыграла Ірына Аўгусціновіч паднялі яшчэ больш і так узнёслы настрой гледачоў. З вялікай асалодай прысутныя паслухалі і адноўлены рэпертуар вакальнай групы “Бліскавіца” і яе асобных салістак.