У фае Дома культуры гаспадыня сустрэчы павітала ўсіх гасцей хлебам-соллю і запрасіла ў музейную залу. Размова пачалася з пазнавальных звестак пра мясцовыя народныя святы і абрады, прыказкі і прымаўкі, непаўторнасць і адметнасць жыцця нашых вяскоўцаў, беларускую гасціннасць. Вялася гаворка і пра мясцовыя рушнікі- набожнікі, іх арнамент і малюнак. Затым размова пайшла пра нацыянальную кухню, разважалі пра каштоўнасць хлеба і бульбы. Усе разам прыпомнілі стравы з бульбы, рыбы, малака, абмяняліся рэцэптамі прыгатавання мясцовага квасу, бярозавіка, медавухі.
Напрыканцы прысутныя пакаштавалі некаторыя мясцовыя стравы. Асабліва да спадобы гасцей прыйшлася страва вёскі Сівіца «Шальбабоны з груцай». На працягу сустрэчы-гасцёўні прысутныя шуткавалі, прыпаміналі цікавыя выпадкі і вясёлыя гісторыі з жыцця вяскоўцаў.