У канцэртнай праграме былі прадстаўлены ўсе жанры аматарскай творчасці, якія атрымалі развіццё ў Доме культуры, таму яна атрымалася насычанай і цікавай. Глядзельная зала ўяўляла сабой “вясковы дом”, у якім гаспадыні, вядучыя праграмы, гасцінна сустракалі гасцей. Узгадваліся народныя традыцыі і абрады, гучалі народныя песні ў выкананні Юліі Віктараўны Грудзіна і Валянціны Васільеўны Жук. Удзельніцы аматарскага тэатра мініяцюр “Весялухі” прадставілі вясёлыя мініяцюры. Як заўсёды, парадавалі вакальнымі нумарамі жаночая вакальная група “Чараўніца” і саліст В.Кундро. Але цэлы шквал глядацкіх апладысментаў быў адрасаваны удзельніцам дзіцячага гуртка сольных спеваў “Вясёлыя ноткі” і мясцоваму юнаму артысту ў ролі “бравага марака”, якія прадставілі вядомую песню “На пабыўку едзе…” у сваім, дзіцячым бачанні. Невялікі салют і вакальная кампазіцыя “Беларусь мая, сінявокая” у фінале канцэртнай праграмы сталі яшчэ адным прызнаннем у каханні да сваёй малой Радзімы, да роднай Беларусі.
