Па словах некаторых вяскоўцаў, нават ноччу не спалася ў чаканні канцэрту! Таму невыпадкова прынялі артыстаў з такой велізарнай радасцю. Загадзя вызначылі і падрыхтавалі месца для імправізаванай "сцэны" і "глядзельнай залы" у самым маляўнічым месцы. Канцэртная праграма праходзіла ў рамках абласной акцыі "Ваенная агітбрыгада" і была прысвечана 75-годдзю вызвалення Беларусі ад нямецка-фашысцкіх захопнікаў. У ёй прагучалі музычныя нумары ў выкананні Я. Давыдзенкавай і М. Пашука, аўтарскія вершы, якія прачытала Т. Дамашэвіч, былі прыняты гледачамі вельмі цёпла. Але яшчэ больш станоўчых эмоцый, радасці, добрых шчырых усмешак і захаплення выклікалі выступленні юных жодзішкаўскіх зорачак-Ксеніі Мізула і Алены Кавяка, якія свае лепшыя музычныя нумары падарылі Станіславе Станіславаўне Харужык – равесніцы знамянальнай даты. З сямідзесяціпяцігоддзем, якое адзначыла Станіслава Станіславаўна сёлета, яе ад усёй душы павіншавалі і ўсе ўдзельнікі канцэрта.Пасля завяршэння праграмы гледачы доўга не хацелі адпускаць гасцей, і па іх шматлікіх просьбах дадаткова былі выкананы песні "Бацькоўскі дом", "Вёсачка мая", "Ой, у полі тры дубкі" і іншыя. Іх ужо і публіка спявала разам з удзельнікамі агітбрыгады. Канцэрт "на біс" завяршыўся вясёлым карагодам, у якім удзячныя жыхары вёсак Паніжаны і Буянцы закружылі любімых выканаўцаў.